نئی دہلی،9 ؍اکتوبر (آئی این ایس انڈیا) کانگریس کے سینئر لیڈر کپل سبل نے جمعہ کو لکھیم پور کھیری تشدد پر وزیر اعظم نریندر مودی کی خاموشی پر سوال اٹھایا اور کہا کہ انہیں کم از کم ہمدردی کا ایک لفظ بولنا چاہیے ،آپ کو بات کرنی چاہیے۔ انہوں نے ٹویٹ کیاکہ لکھیم پور کھیری کا خوفناک واقعہ۔ مودی جی ، آپ خاموش کیوں ہیں؟ آپ کی طرف سے ہمدردی کے ایک لفظ کی ضرورت ہے۔ یہ مشکل نہیں ہونا چاہیے۔

کانگریس لیڈر نے یہ سوال بھی پوچھا کہ اگر آپ اپوزیشن میں ہوتے تو آپ کا رد عمل کیا ہوتا؟ براہ کرم ہمیں بتائیں۔ضلع لکھیم پور کھیری کے ٹکونیا علاقے میں اتوار کو ڈپٹی چیف منسٹر کیشو پرساد موریہ کے دورے کے خلاف ہوئے تشدد میں چار کسانوں سمیت آٹھ افراد ہلاک ہو گئے۔ اس معاملے میں مرکزی وزیر مملکت برائے داخلہ اجے مشرا کے بیٹے آشیش سمیت کئی لوگوں کے خلاف مقدمہ درج کیا گیا ہے۔